Bojkoti i kampionatit, skuadrat e superiores kërkojnë përmbushjen e katër kërkesave

Kampionati Shqiptar nuk do të fillojë në datën 12 shtator. Edhe pse ishte programuar që të ishte kjo data për fillimin e edicionit të ri futbollistik, skuadrat e Ligës profesioniste kanë marrë vendimin për të mos zbritur në fushë, deri në plotësimin e katër pikave nga qeveria, të cilat konsiderohen si të rëndësishme për ecurinë e aktiviteti futbollistik në vend.

Në datën 5 gusht, skuadrat e Superiores iu drejtuan qeverisë me katër kërkesat e tyre, që konsistonin në uljen e TVSH-së ne masën 6%, faljen e gjobave dhe kamatëvonesat e detyrimeve tatimore, fiskale e të sigurimeve të prapambetura, shtrirjen e pezullimit të tatimit mbi të ardhurat e lojtarëve nga 2 në 10 vite si dhe miratimin e një ligji sponsorizimi, i ndërtuar në bashkëpunim me aktorët e sportit.

Burime pranë Ligës profesioniste bëjnë me dije se deri më tani nuk ka pasur asnjë reagim nga ana e qeverisë për të negociuar përmbushjen e këtyre pikave. Drejtuesit e skuadrave të Superiores kanë shkuar deri në pikën që kanë paralajmëruar dhe protesta, në rast se qeveria nuk do të reagojë, për kërkesat e tyre. 

Bojkoti pa afat i Ligës Profesioniste është përkrahur dhe nga Komiteti Ekzekutiv, që përmes një letre ka bërë të ditur miratimin e shtyrjes së kampionatit.