Kuvendi mund të zgjedhë sot emrin e prokurorit të përgjithshëm të Republikës

Pavarësisht traumës së rëndë, ku ndodhet vendi pas goditjes nga tërmeti shkatërrimtar i 26 nëntorit, politika pritet t’i rikthehet veprimtarisë së saj normale ditën e sotme.

Kuvendi i Shqipërisë do të mblidhet ditën e sotme dhe një nga çështjet që priten të trajtohen është pikërisht zgjedhja e kreut të organit të akuzës.

Vendi mund ta njohë qysh ditën e sotme emrin e kryeprokurorit në një garë, ku janë rreshtuar Olsian Çela, kryeprokurorja aktuale e përkohshme Arta Marku dhe Fatjona Memçaj.

Parlamentit do t’i duhet një shumicë konsensusi prej 84 votash për zgjedhjen e kreut të akuzës, të cilat aktualisht mazhoranca socialiste nuk i disponon.

Gazetari i Euronews Albania Ervin Koçi raporton se ky konsensus mund të arrihet pasi duke marrë shkas nga seanca e shkuar, opozita ka shfaqur bashkëpunim për sistemin e drejtësisë.

Nëse seanca e sotme dështon në zgjedhjen e kryeprokurorit, parlamenti do të mblidhet sërish për të diskutuar një nga emrat e përcjella nga Këshilli i Lartë i Prokurorisë. Nëse parlamenti nuk shprehet brenda 30 ditëve, siç e parashikon ligji, atëherë vepron mekanizmi zhbllokues. Në këtë rast, z. Olsian Çela mund të konsiderohet kryeprokuror i ri i republikës së Shqipërisë.

Një tjetër çështje e nxehtë do të jetë fati i Komisionit Parlamentar për shkarkimin e Presidentit të Republikës, një nismë kjo e lënë në mes nga mazhoranca për shkak të goditjes nga tërmeti.

Socialistët kërkojnë që objekt i komisionit të bëhet edhe debati i krijuar për zgjedhjen e një anëtare të Gjykatës Kushtetuese, znj. Marsida Xhaferllari. Partia Socialiste e gjykon të jashtëligjshëm miratimin e Xhaferllarit nga presidenti, ndaj kërkon të bëhet pjesë e komisionit hetimor.

Buxheti i vitit 2020 pritet gjithashtu të rishikohet pas dëmtimeve dhe nevojave të krijuara nga tërmeti. Gjithashtu në pritje të miratimit janë dhe katër akte normative të qeverisë, të cilat i vijnë në ndihmë banorëve të prekur nga tërmeti.