Zjarri në Priskë kthehet motiv për replika politike mes Veliajt dhe Metës

Kryetari i Bashkisë Tiranë ironizoi të dielën Presidentin Ilir Meta rreth zjarrit që kishte përfshirë zonën e Priskës.

Përmes një postimi në Twitter, në të cilin shpërndau katër foto të zjarrfikësve, Veliaj theksoi se përkundër “kritikës së vazhdueshme nga politikanët që 30 vjet kanë ndezur zjarre dhe kritikonin punën e tyre mes birrave në pushim të ndeshjeve skoceze” ata “e gdhinë në terren të thepisur duke shmangur rrezikun për banorët”.

Falemnderit 60 Zjarrfikesve heronj! ?

Teksa politikanet qe veç kane ndezur zjarre 30 vjet, kritikonin punen e tyre mes birrave ne pushim te ndeshjeve skoceze, heronjte e Zjarrfikeses @BashkiaTirane e gdhine ne Priske ne terren te thepisur duke shmangur rrezikun per banoret!??❤️ pic.twitter.com/7hXpbobEkV

— Erion Veliaj ?‍♂️?⚽️?? (@erionveliaj) September 13, 2020

Postimi në fjalë u bë paraditen e së dielës, ndërkohë që mbrëmjen e së shtunës, Presidenti Ilir Meta pati shprehur shqetësim për zjarret që ishin shfaqur në verilindje të Tiranës, në zonën e Priskës.

Meta e cilësoi “të pajustifikueshëm” faktin se “prej orësh Shërbimi Zjarrfikës dhe i Ministrisë së Mbrojtjes” nuk kishin angazhuar të gjitha mjetet dhe efektivët për minimizimin e pasojave.

Presidenti, i cili njihet për mbështetjen publike të klubit skocez të futbollit, Celtic, kërkoi edhe “përgjegjësi ligjore”.

Nuk është hera e parë që Veliaj përfshihet në replika politike me Presidentin. Më parë ai ka pasur qasje të tillë edhe për çështjen e Teatrit Kombëtar shembja e të cilit kundërshtohej nga Meta.

Lexoni gjithashtu:

Veliaj për teatrin: Nuk tërhiqemi, Presidenti të bëhet me Ndrenikën jo me Bashën

Çështja e Teatrit Kombëtar, Meta i përgjigjet Veliajt: Europa nuk është thjesht euro, por kulturë e vizion