TikTok refuzon ofertën e Microsoft, mbetet në pikëpyetje fati i aplikacionit kinez në SHBA

Microsoft deklaroi të hënën se oferta e saj për të blerë shërbimet e kompanisë kineze ByteDance, e cila operon Tik-Tok-un në SHBA, Kanada, Australi, Zelandë të Re qe refuzuar. Kjo ka lënë të kuptohet se kompania tjetër amerikane, Oracle, e nxitur të marrë këto shërbime, do të nisë bashkëpunimin.

Nga të tre kompanitë përkatëse – ByteDance, Microsoft dhe Oracle, – nuk ka pasur komente të qarta rreth çështjes, e cila është kthyer në politike duke marrë vëmendje të madhe për shkak të përfshirjes direkte të Presidentit Donald Trump.

Në muajin korrik Trump kërkoi me detyrim shitjen e shërbimeve të kompanisë ByteDance. Më 6 gusht ai vuri si ultimatum një afat prej 45 ditësh, që shërbimet t’i shiteshin një sipërmarrjeje amerikane, në të kundërtën ByteDance dhe vetë Tik-Tok-u në SHBA do të përballeshin me mbylljen.

Ky vendim është argumentuar me shqetësimet e ngritura nga autoritetet amerikane rreth mundësisë për dezinformim dhe keqpërdorim të mundshëm të informacionit të gjeneruar nga ky aplikacion. Shqetësimet thuhet se vënë në diskutim sigurinë kombëtare të SHBA-së. Çështja në fjalë është ngritur pas disa muajsh tensione mes Shtëpisë së Bardhë dhe Pekinit të cilat patën fillimisht zanafillë pandeminë e COVID-19, më pas çështjet ekonomike e më tej qëndrimet kundrejt situatës së Hong Kongut.

Tensionet përshkallëzuan kur SHBA urdhëroi që Kina të tërheqë përfaqësinë diplomatike në Teksas, e cila u akuzua për spiunazh.

Urdhri ekzekutiv i firmosur nga Presidenti Trump për shitjen me detyrim të ByteDance, ka si afat 20 shtatorin, megjithëse ai vetë ka deklaruar shpesh se afati do të jetë data 15-të.

Tik-Tok është një aplikacion i krijuar në vitin 2016 që ka të bëjë me ndarjen e videove të shkurtra 3 deri në 15 sekonda në të cilat përdoruesit mund të dublojnë, inskenojnë apo dhe aktrojnë sekuenca të ndryshme.

Aplikacioni, që në Kinë quhet Doyin, u përhap masivisht vitet e fundit duke pasur shtrirje globale me qindra milionë përdorues.

Ekspertë të ndryshëm në SHBA kanë ngritur shqetësime për keqpërdorimin e informacioneve të ndara nga përdoruesit, të cilat mund të shfrytëzohen nga keqbërës, pedofilë madje edhe agjencitë sekrete të informacionit, ndërkohë që përdorimi i TikTok-ut në zyrat publike është ndaluar prej kohësh në SHBA kjo pasi ky aplikacion dyshohet se censuron informacionet kundër Partisë Komuniste Kineze dhe dezinformon për ngjarjet në Azi.

Lexoni gjithashtu:

Trump cakton afat për shitjen e TikTok, kërkon përqindje për qeverinë amerikane

Trump gati të vendosë sanksione për të tjera kompani kineze

Tiktok ngre padi ndaj administratës së Trump, publikon informacion me të drejtat e përdoruesve