Kush është kryeprokurori i ri, karriera e Olsian Çelës në organin e akuzës

Shqipëria do të ketë një prokuror të përgjithshëm më mandatat 7-vjeçar duke i dhënë fund mandatit të komanduar të Arta Markut, e cila qëndroi në këtë post për dy vite.

Olsian Çela u votua me shumicë të cilësuar prej 101 votash pro në parlament dhe do të drejtojë akuzën shqiptare deri në fund të vitit 2026.

Çela e nisi karrierën e tij në vitin 2001 në Prokurorinë e Tiranës dhe qëndroi në këtë post deri në 2004. Që nga kjo kohë deri në momentin që u votua në parlament, ai ka qenë prokuror në Prokurorinë e Krimeve të Rënda. Vetëm për tre muaj në 2018, Çela pati një shkëputje nga ky institucion pasi u komandua në akuzën e Beratit.

Në këtë periudhë ai u konfliktua me drejtuesen aktuale të prokurorisë duke refuzuar të lexojë pretencën për Emiljano Shullazin, pas dorëheqjes se prokurorit të çështjes. 

Nga viti 2008 deri në vitin 2012 ai ka drejtuar Krimet e Rënda. Çela ka hetuar disa dosje mjaft të rëndësishme në Prokurorinë e Krimeve të Rënda, siç ishte ajo e laboratorit të kokainës në Xibrakë. Gjithashtu, ai ka hetuar edhe vrasjen e Mirit të Xhikes, ngjarje për të cilën u dënua Lavdërim Tufa. Çela ka hetuar edhe grabitjen e ndodhur ne vitin 2016 në pistën e aeroportin e Rinasit, ku u vodhën rreth 1 milion euro.