Prej nëntë muajsh jetojnë në shtëpinë e dëmtuar nga tërmeti, PD dencon rastin e familjes Balla në Kombinat

Partia Demokratike denoncoi të enjten situatën e vështirë që po kalon familja Balla në Kombinat, e cila vazhdon të jetojë në shtëpinë e dëmtuar rëndë nga tërmeti i 26 nëntorit 2019.

Bukuria Balla i tha zëdhënëses së PD-së se prej 9 muajsh jeton me bashkëshortin në shtëpinë e dëmtuar pasi nuk ka asnjë zgjidhje tjetër. Ajo shprehet se nuk ka marrë asnjë ndihmë nga qeveria dhe Bashkia Tiranë ndërsa shton se askush nga komisionet e vlerësimit nuk ka ardhur për t’i vlerësuar gjendjen e shtëpisë.

“Kanë ardhur, i kanë parë, maksimumi… por asnjë gjë nuk më kanë dhënë. Vijnë, shikojnë dhe marrin kokën dhe udha e mbarë,” – thotë Bukurie Balla duke shtuar se nuk ka as dokumente.

“Unë nuk jam e zonja për ta përballuar fare më. Kam qenë pa bukë, hapni raftet e mia e shikoni, se po laj borxhet e qirave të dynjasë. Më mirë në shtëpinë time e di se vdes në shtëpinë time, do të vdes, të vdes,” – vazhdon ajo më tej.

Prej një muaji opozita denoncon raste të ndryshme familjesh të mbetura pa zgjidhje nga situata që la pas tërmeti i 26 nëntorit, i cili u mori jetën 51 personave.

Rastet e sjella nga PD-ja kanë qenë nga Thumana, Durrësi, Shijaku, Kurbini, Mamurrasi, Bubqi, Lezha dhe Tirana.

Në një intervistë për Euronews Albania, ministri për Rindërtimin, Arben Ahmetaj i hodhi poshtë pretendimet. Ai këmbënguli se nuk ka pasur vonesa, dhe se problemet kryesore kanë ardhur për shkak të pandemisë.

Megjithatë ai garantoi se brenda vitit 2020 një pjesë e madhe e familjeve të cilave iu dëmtuan shtëpitë do të kenë mundësinë të hynë në banesat e reja.

Lexoni gjithashtu:

Tërmeti u prishi shtëpinë, PD sjell rastin e familjes në Mamurras: Ky, dimri i dytë në çadër

Grantet e rindërtimit, PD denoncon rastin e familjes në Shijak: Kemi bërë vetëm letra, s’kemi marrë asgjë

PD denoncon rastin e qytetares nga Lezha, prej 10 muajsh me burrin e paralizuar dhe tre fëmijët në çadër

Bilanci i rindërtimit, Ahmetaj në Euronews Albania: Nuk ka vonesa, brenda vitit shumë banorë do futen në banesa të reja