PD: Shkollat me kushte minimale të higjienës, 30% nuk kanë as ujë

Duke iu referuar një raporti të Fondit të Emergjencës së Kombeve të Bashkuara për Fëmijët (UNICEF), Partia Demokratike akuzoi qeverinë se nuk u siguron shkollave kushte të mjaftueshme të higjienës dhe as të përdorimit të internetit apo teknologjisë.

“Vetëm 70% e shkollave tona kanë kushtet minimale të higjienës dhe 30% e tyre nuk kanë as ujë dhe as kushte minimale pastërtie,” – shkroi ish-deputetja Jorida Tabaku në Facebook duke iu referuar raportit të UNICEF mbi ujin e pijshëm dhe higjienën në shkolla.

Ajo tha se në raportin e fundit UNICEF ka përshkruar situatën duke u bazuar në vëzhgime pasi qeveria siç tha ajo “nuk bën publike të dhënat e sakta”.

“Jeta dhe shëndeti i nxënësve dhe mësuesve janë sot më të rëndësishme se çdo formë e propagandës bajate. Ndaj në vend të gënjeshtrave të paketuara me bojërat e rilindjes, është koha të merren masa urgjente për të siguruar urgjentisht kushte higjeno-sanitare në të gjitha institucionet arsimore në vend,” – apeloi Tabaku teksa theksoi se situata është alarmante duke pasur parasysh faktin se aktualisht bota përballet me pandeminë e COVID-19.

Komenti i Tabakut vjen në një kohë kur qeveria vendosi të rihapë shkollat për sezonin akademik 2020-2021. Ministrja e Arsimit Besa Shahini (e zëvendësuar më pas nga Evis Kushi) dhe Kryeministri Edi Rama kanë siguruar se janë marrë të gjitha masat që në shkolla të garantohet higjiena dhe distanca fizike.

Lexoni gjithashtu:

Java e parë në shkollat e vendit, disa mësues të infektuar me COVID-19

Nxënësit kthehen në klasa, nis zyrtarisht shkolla me masa antiCovid, paqartësi dhe frikë

“Mësuesit po përdoren si skllevër”, PD: Qeveria duhet të financojë shkollat dhe të shtojë stafin

Viti i ri shkollor, PD: Më shumë se 50 mësues, edukatorë e sanitarë me Covid-19