Dhuna në familje, Italia financon për strehim dhe formim profesional

Ishte vetëm 14 vjeçe kur ra pre e abuzimit seksual nga njerku i saj.

Një familje nga Gjirokastra vendosi ta adaptojë, por qëllimin e kishte të qartë se veshka e 14-vjeçares do të shërbente për transplant për vajzën e tyre të sëmurë.

Trafikimi u identifikua nga policia më pas e mitura u rehabilitua në një qendër. Ngjarja u bë publike në konferencën e organizuar nga ambasada e Italisë në Ditën Ndërkombëtare për Eliminimin e Dhunës ndaj Grave.

Falë mbështetjes nga qendra Vatra ajo tashmë është bërë e zonja e vetes duke lënë pas të shkuarën.

Ambasada Italiane në Tiranë ka dhënë kontribut prej15 vitesh lidhur me këtë çështje, ku janë ndihmuar rreth 10 mijë gra.

“Në Itali ashtu si në Shqipëri, çdo vit ne kemi qindra vrasje grash, pra ne duhet të luftojmë që ky numër të ulet, të reduktohet. Të ulet numri i krimeve ndaj grave, duhet të punojmë në të gjitha rrafshet me të gjithë aktorët. Objektivi ynë është që të arrijmë një ditë, nuk them dhuna zero, sepse dhuna do të ekzistojë gjithmonë, por tolerance zero ndaj këtij fenomeni,” – u shpreh Fabrizio Bucci, ambasadori italian në Shqipëri.

Ministria e Shëndetësisë raporton se gjashtë gra kanë humbur jetën këtë vit nga dhuna në familje.

LEXONI GJITHASHTU:

• Policia turke arrestoi protestuesit kundër dhunës ndaj grave
• Lirohen nga paraburgimi tre infermieret që dhunuan të moshuarën në Pejë