Maqedonia e Veriut nuk merr vendim për hapjen e shkollave

Komisioni për sëmundje ngjitëse në Maqedoninë e Veriut nuk mbështet idenë për hapjen e shkollave. Gjatë mbledhjes së mbajtur sot, komisioni nuk ka marrë asnjë vendim dhe pritet të mbahet një tjetër mbledhje.

Por, gjatë diskutimeve për shkak të situatës epidemiologjike është propozuar dhe mbyllja e çerdheve të cilat janë hapur prej pak ditësh.

Korrespondenti i Euronews Albania, Benjamin Arifi raporton se do të ketë një tjetër mbledhje në ditët e ardhshme mbi këtë çështje.

Përveç dyzimit të Komisionit për sëmundje ngjitëse në Maqedoninë e Veriut edhe opinioni publik është i ndarë në qëndrime lidhur me hapjen apo jo të shkollave.

Kjo vjen për shkak se tani në kushtet e COVID-19, shkollat do të duhet të bëjnë mësim të reduktuar dhe dalja parakohe do të ishte problem për prindërit e punësuar.

Vetë qeveria ka marrë vendim në parim për hapjen e shkollave më 1 tetor, por në praktikë këtë kompetencë ia ka deleguar vetë shkollave për të vendosur nëse mësimi do të ndiqet me prezencë fizike apo online.