Seanca e parë konstitutive, pritet formimi i qeverisë së re në Malin e Zi, mbetet jashtë PDS-ja e Gjukanoviç

Nis sot seanca konstitutive e parlamentit në Mal të Zi, ku pritet të zgjidhen kryetarët dhe nënkryetarët. Hapi i radhës pas sesionit të parë pritet të jetë formim i  qeverisë së re dhe për herë të parë në tri dekada nuk do të përfshijë Partinë Demokratike të Socialistëve të Presidentit Milo Djukanovic.

Në vend të saj, tre koalicione opozitare kanë vendosur të formojnë qeverinë e ardhshme. Qeveria e re do të përbëhet nga 3 partitë, ‘Për ardhmërinë e Malit të Zi’, ‘Paqja është kombi ynë’ dhe ‘E zezë në të bardhë’, që së bashku do të kenë 41 vende.

Ata kanë bërë me dije nënshkrimin e një marrëveshjeje koalicioni, po ende nuk kanë rënë dakord për një kandidat për kryeministër.

Sipas marrëveshjes, Mali i Zi do të vazhdojë reformat e nevojshme për anëtarësimin në BE, të forcojë aleancat me anëtarët e NATO-s. Po ashtu, koalicioni ra dakord të mos tërheqë vendimin për njohjen e Kosovës si shtet i pavarur.