Çmimi i madh i Rusisë në Formula 1, Bottas i pari në prova, zhgënjen Hamilton

Valtteri Bottas regjistroi kohën më të shpejtë në sesionin e parë të provave të lira, para Çmimit të Madh të Formulës 1 në Rusi.

Pas pilotit të Mercedezit u rendit Daniel Ricciardo i skuadrës Reno. Paraqitje të mirë bënë dhe Max Verstappen i Red Bull dhe Sergio Perez e Lance Stroll të Racing Point, të cilët ishin në 5 vendet e para.

Gjashtë herë kampioni Lewis Hamilton ishte shumë larg pritshmërive. Britaniku i cili është vetëm një sukses larg barazimit të rekordit të legjendës Michael Schumacher me 91 suksese, u rendit në vendin e parafundit, paçka se bëri vetëm pak xhiro.

Po kështu, zhgënjyen sërish pilotët e Ferrarit, duke dëshmuar se ky nuk është sezoni i tyre. Sebastian Vettel u rendit në vendin e nëntë, ndërsa Leclerc nuk shkoi më larg se vendi i 11-të.

Gara e kësaj fundjave në Sochi do të jetë e para për këtë edicion që do të zhvillohet në praninë e një numri të reduktuar tifozësh, të cilët duhet të zbatojnë një sërë rregullash kundër COVID.