Meta i shqetësuar për zonat rurale: Qeveria miliarda për koncesione të dyshimta e jo për bujqësinë

Presidenti Ilir Meta shprehu të shtunën shqetësimin për sa i përket të dhënave më të fundit të raportuara nga Instituti i Statistikave rreth indeksit të blegtorisë ku në katër vitet e fundit numri i krerëve të bagëtive ka pësuar rënie.

Përmes një postimi në Facebook, Meta e lidhi këtë rënie me politikat e qeverisë, pasi sipas tij “Shqipëria është e fundit në rajon sa i takon mbështetjes së bujqësisë”.

“Braktisja e bujqësisë dhe blegtorisë po shpopullon zonat rurale dhe më të bukura të vendit, ndërkohë që miliarda euro jepen për koncesione të dyshimta dhe tenderë “sekrete”,” – shkroi Meta teksa kërkoi që qasja me mbështetje nga qeveria “duhet të ndryshojë një herë e përgjithmonë”.

Sipas të dhënave të INSTAT, në vitin 2019 në Shqipëri kishte rreth 2.6 milionë bagëti si lopë, dele dhe dhi, ndërkohë që rreth 5 vite më parë shifrat ishin 2,8 milionë.

Lexoni gjithashtu:

Shqipëria e katërta në botë dhe e para në Evropë për aplikimet për azil