Konferenca tradicionale e Putin shtyhet për herë të parë në 10 vjet

Konferenca për shtyp e cila është tradicionale e fundvitit për presidentin rus Vladimir Putin nuk do të mbahet.

Konferenca mbi gjendjen e kombit para Asamblesë Federale të Federatës Ruse ka të ngjarë të mbahet vitin e ardhshëm.

Zëdhënësi i Kremlinit, Dmitry Peskov njoftoi se për herë të parë në 10 vjet tradita do të prishet.

“Sa i përket konferencës së madhe për shtyp, po, ajo nuk do të mbahet para Vitit të Ri”, tha Peskov, duke shtuar se Putin mund të “gjejë një mënyrë” për të folur me mediat, raportoi TASS.

Përkatësisht, ai tha se presidenti rus do të gjejë një mundësi për të biseduar me gazetarët, duke theksuar se këtë “e bën rregullisht”.

Peskov nuk dha një arsye pse nuk do të mbahet konferenca vjetore për shtyp.

Gjatë 10 viteve të fundit, konferencat vjetore për gazetarët rusë dhe të huaj zakonisht kanë zgjatur me orë të tëra, me presidentin rus duke iu përgjigjur një gamë të gjerë pyetjesh.

Mediat perëndimore vlerësojnë se këtë vit konferenca për shtyp nuk do të mbahet për të parandaluar pyetjet rreth operacionit special ushtarak rus në Ukrainë.