Mjekët në kohë pandemie, mjekja Liljana Shyqyriu: Rritja e pagave premtim i vonuar

Në një intervistë për Euronews Albania mjekja Liljana Shyqyriu foli rreth rritjes së pagave me 40% për bluzat e bardha duke e cilësuar këtë si një premtim të vonuar e të pambajtur.

Ndër të tjera ajo e cilësoi këtë premtim një kopje të asaj që opozita ka propozuar prej një viti dhe theksoi se kjo nuk është një zgjidhje e problemeve të mëdha që ka në sistemin shëndetësor.

“Kjo rritje pagash duhet absolutisht të shoqërohet me rregulla të tjera dhe me reforma të thella sa i përket sistemit shëndetësor”,- tha ajo.

Shyqyriu përmendi situatën e pandemisë duke nënvizuar mungesën e menaxhimit, mungesën e strategjisë dhe paaftësinë e autoriteteve shëndetësore për të drejtuar këtë sistem.

Pyetur nëse e konsideron zgjidhje propozimin e Partisë Demokratike për bonusin për mjekët dhe infermierët znj. Shyqyriu theksoi se edhe bonusi është një premtim i pambajtur. Sipas saj fillimisht mjekët e vijës së parë janë shpërblyer ndërkohë që më pas u vu kriteri i bonusit që merret në bazë të numrit të tamponave që mjekët aplikonin. Liljana Shyqyriu sqaroi se kjo metodë është përdorur për mjekët në zonat e tjera dhe jo mjekët e Tiranës.

Mjekja ju referua dhe vështirësive që ajo personalisht ka hasur në punën e saj gjatë periudhës së pandemisë duke përmendur këtu përjashtimin nga skema të mjekut të familjes dhe mungesa e pajisjeve mbrojtëse për gjithë personelin mjekësor.

Së fundmi për përmirësimin e kushteve të situatës mjekja Liljana Shyqyriu bëri një apel për Ministrinë e Shëndetit dhe kërkoi ndërtimin e një strategjie për pozicionin e mjekut të familjes në raport me ndjekjen e të sëmurit, pajisjen e personelit shëndetësor me pajisjet e duhura për tu mbrojtur dhe hartimin e protokolleve të mjekimit.

Lexoni gjithashtu: 

Kryeministri Rama zyrtarizon rritjen e pagave për mjekët dhe mësuesit nga 1 janari