Sveçla: Do të vazhdojmë punën e angazhimin tonë për Kosovën me përkushtim të plotë

Ministri i Punëve të Brendshme të Kosovës, Xhelal Sveçla e ka pritur ndërrimin e viteve në pikën e kontrollit policor në Urën e Bistricës, bashkë me zyrtarët policor që ishin në detyrë dhe me ministrin Liburn Aliu.

Përmes një postimi në rrjetet sociale, Sveçla u shpreh se para vizitës në Bistricë, ata u mblodhën në Mitrovicë me pjesëtarët e të gjitha njësiteve që ishin në detyrë, për të festuar vitin e ri, ndërsa vazhduan vizitat edhe në stacionet policore në Jasenovik, Koshtovë dhe Stacionin e Ndërhyrjes së Shpejtë të Kufirit në Jarinje.

Ndër të tjera, Sveçla nënvizoi se do të vazhdohet puna dhe angazhimi për të kryer me nder e profesionalizëm misionin për Kosovën dhe qytetarët e saj.

“Ndjenjë e veçantë gëzimi e krenarie që ndërrimin e motmotit e pritëm në pikën e kontrollit policor në Urën e Bistricës, bashkë me zyrtarët policor që ishin në detyrë dhe me Ministrin Liburn Aliu me të cilin kemi pasur bashkëpunim intenziv në vitin që lamë pas. Para kësaj vizite në Bistricë, u mblodhëm në Mitrovicë me pjesëtarët e të gjitha Njësiteve që ishin në detyrë, për të festuar vitin e ri ndërsa vazhduam vizitat edhe në stacionet policore në Jasenovik, në Koshtovë dhe në Stacionin e Ndërhyrjes së Shpejtë të Kufirit në Jarinje.

Ndjehem jashtëzakonisht i lumtur që përmbyllëm një vit me suksese të shumta ndonëse të sfiduar jo rrallë herë. Do të vazhdojmë punën e angazhimin tonë me vullnet e përkushtim për të kryer me nder e profesionalizëm misionin tonë të përbashkët që kemi për Republikën dhe për qytetarët tanë”, shkroi Sveçla në Facebook.

LEXONI GJITHASHTU

• Kurti thirrje NATO-s: Të rritet prania e ushtarëve paqëruajtës në Kosovë
• S’ka garanci për formimin e Asociacionit të komunave me shumicë serbe, thotë Kurti
• Vuçiç: Në janar, ndërkombëtarët në Beograd për marrëveshjen me Kosovën