Zbardhja e krimit 40-vjeçar, Vatikani njofton rihapjen e hetimeve për 15-vjeçaren

Një manifestim me disa qindra pjesëmarrës u mbajt në Romë për të kërkuar zbardhjen e fatit të 15-vjeçares Emanuela Orlandi, e zhdukur 40 vjet më parë.

Protesta, ku merrnin pjesë familjarë dhe miq të familjes Orlandi, u mbajt pak ditë pasi Vatikani njoftoi se kishte hapur një hetim të ri për çështjen më të vjetër të tij.

Zhdukja e 15-vjeçares Orlandi, një ngjarje e pazbardhur kurrë, ka frymëzuar një seri teorish komploti dhe madje një serial të suksesshëm në rrjetin Netflix.

Vajza e një punonjësi të Vatikanit, Emanuela u pa për herë të fundit teksa largohej nga klasa e muzikës në Romë më 22 qershor të vitit të largët 1983.

Dekada me spekulime të shumta pasuan zhdukjen e saj, me hipoteza të ndryshme ku fajësoheshin mafia, shërbimet sekrete, masoneria dhe madje përflitej për një komplot brenda vetë Vatikanit.

Familja Orlandi ka luftuar vazhdimisht për të gjetur të vërtetën dhe hapja e hetimit të ri, me nismë të kryeprokurorit të Selisë së Shenjtë, ishte pjesërisht meritë e kërkesave të saj.

Megjithatë, familjarët e vajzës thonë se janë ende në pritje për të mësuar detajet e dosjes dhe se në cilat pista do të fokusohet hetimi i ri.

LEXONI GJITHASHTU: 

• “Do ketë tensione”, analisti: Barrikadat do rikthehen ditën e Pavarësisë së Kosovës
• Me violinë nga SHBA në Gjirokastër, Stefan Xhori koncert recital
• Dauti: Perceptimi negativ për shqiptarët vazhdon, disa tabloidë vazhdojnë shkruajnë