Kryetarja e Urdhrit të Farmacistëve apel për furnizimin me vaksinat antigrip: Rrezik për mbivendosje simptomash

Diana Toma, Kryetare e Urdhrit të Farmacistëve, foli rreth furnizimit të vendit me vaksina duke qenë se aktualisht vetëm një depo farmaceutike e ka sjellë vaksinën, edhe ajo me një numër të kufizuar.

Sipas saj arsyet dhe shkaqet se përse vaksina po vjen me një numër kaq të kufizuar nuk mund të bëhen publike.

“Jemi në informacion se pritet dhe nga importues të tjerë sepse fatmirësisht nuk është importuesi i vetëm”,- tha ajo teksa sqaroi se nuk dihet se kur mund të vijnë këto vaksina.

Znj. Toma sqaroi se institucioni që ajo përfaqëson merret me shërbimin farmaceutik dhe jo me furnizimin.

Në fjalën e saj Toma tha se është Ministria e Shëndetësisë ajo që mund të japë një informacion më të detajuar për vaksinat duke qenë se dhe lejet e importit dalin nga aty.

“Fakti që ne kemi reaguar ka konsistuar në monopolizimin e tregut të vaksinës e cila cenon drejtpërdrejtë shërbimin dhe nuk e bën të aksesueshme për qytetarin atë vaksinë që gjendet prezent në treg”,- tha Diana Toma teksa theksoi se kjo prish dhe balancat e aktivitetit të farmacive.

Kryetarja e Urdhrit të Farmacistëve bëri thirrje se për këtë çështje duhet të mbajë përgjegjësi Ministria e Shëndetësisë dhe duhen marrë masa pasi duke mos bërë vaksinën rrezikohet që simptomat e gripit stinor t’i mbivendosen simptomave të virusit COVID-19.  

Lexoni gjithashtu: 

Vaksina kundër gripit sezonal, frika nga coronavirus shton kujdesin, dyndje nga ata që e përfitojnë falas

Vaksina kundër gripit, Gjergj Koja: Është e certifikuar nga OBSH, prodhohet në Korenë e Jugut