Shqipëria ‘harron’ fitoren, kuqezinjtë barazuan pa gola me Lituaninë në transfertë

Për të tretën ndeshje radhazi, kombëtarja shqiptare nuk arrin të fitojë. Skuadra e Edoardo Rejas nuk arriti më shumë se një barazim pa gola në takimin me Lituaninë. Goditja e Seferit dhe pretendimet për 11-metërsh ishin të vetmet raste për t’u mbajtur mend në fraksionin e parë.

Lituania krijoi volum, madje arriti të gjente dhe golin, por gjyqtari sinjalizoi goditje dënimi për një faull në dëm të Berishës.

Zëvendësimet në pjesën e dytë nuk sollën ndryshim në rezultat. Rasti i Trashit pak minuta para fundit të ndeshjes, ishte shkëndija e fundit për kuqezinjtë, të cilët po tregojnë se nuk kanë asgjë më shumë se rivalët e grupit, ndonëse në letër u konsideruan si favoritët e mëdhenj.

Në fund të ndeshjes edhe vetë trajneri Reja u shpreh se ndjen keqardhje për faktin se skuadra nuk po arrin dot të gjejë golin, pasi kjo ishte e treta përballje që skuadra e tij nuk arrin të festojë.

Pas katër ndeshjesh, Shqipëria ka arritur të grumbullojë vetëm 5 pikë në grupin katër të Ligës C.