Ku janë paratë e donatorëve? Dalin shifrat, 5.9 mln dollarë donacion nga të huajt për tërmetin

Pak muaj pasi shqiptarët ishin goditur nga lëkundjet sizmike të 26 nëntorit, bota i tregoi solidaritetin vendit të vogël në Ballkanin perëndimor, duke ofruar 1.15 miliard euro grante dhe hua për të rindërtuar qytetet që u shkundën nga themelet.

Tetë muaj pas premtimit të madh duket se programi i rindërtimit po rëndon vetëm në gjunjët e buxhetit të shqiptarëve. Të dhënat zyrtare të gjetura nga Euronews Albania tregojnë një panoramë krejt tjetër nga fondet e huaja që ka arritur të arkëtojë vendi.

Sipas shifrave zyrtare, bëhet e ditur se në llogaritë e Bankës së Shqipërisë nga jashtë vendit deri ditën e sotme, janë arkëtuar rreth 5.9 milion dollarë të cilat janë futur në programin e rindërtimit.

Shuma total që qeveria shqiptare ka alokuar nga buxheti i këtij viti për të ringritur ato ndërtime që u shembën nga tërmeti është 31 miliard lekë dhe sipas të dhënave të siguruara nga Euronews Albania, rreth 18 milionë dollarë u dhuruan nga shqiptarët në llogaritë e bankave të nivelit të dytë të hapura nga shtetit shqiptar.

Kësisoj, financat shqiptare vijon të jenë të dërrmuara, ku nga njëra anë janë paratë që nevojiten për rindërtimin e banesave individuale të shembura, dhe nga krahu tjetër, vuan edhe nga pasojat e masave shtrënguese ani covid. Ndërsa paratë e premtuara, duket se do të kërkojnë kohë, për tu alokuar tek financat shqiptare.