Yuri Kim: Bëni drejtësi, Shqipëria vend i favorshëm për investime

Ambasadorja e SHBA-ve në Tiranë, Yuri Kim ka bërë apel për forcimin e shtetit ligjor, në  mënyrë që  investimet e  huaja të  zgjerohen. Apeli i Kim vjen nga ceremonia e 20 vjetorit të  Dhomës Amerikane  të Drejtësisë. 

Në përvjetorin e 20 të Dhomës Amerikane në Shqipëri, ambasadorja Yuri Kim deklaron se investitorët amerikanë kanë interes për të bërë  biznes këtu, por ka një  thirrje për ligjvënësit.

“Shteti ligjor duhet të forcohet. E përsëris, të gjithë e dimë se shteti ligjor duhet të forcohet që investimet e huaja të vijnë në vend”, deklaroi Yuri Kim, ambasadore e SHBA-ve në Tiranë.

E pranishme, ministrja e Financave Anila Denaj pranoi se klima e biznesit ka vend për përmirësim, ndërsa lajmëroi prezantimin e një ligji të ri që ndihmon këdo që synon të hapë një biznes.

“Javës që vjen ne startojmë një ligj të ri. Ligji i Start-Up për inovacionin për të sjellë një ambient ligjor të ri për të gjithë iniciatorët e një biznesi”, tha Anila Denaj, ministre e Financave.

Të dy palët vlerësuan kontratën me firmën amerikane Bektel për ndërtimin e Hidrocentralit të Skavicës. Kim tha se shpreson që ky hap i parë do të shënojë dhe fillimin e një liste më të gjatë të kompanive amerikane që vijnë në Shqipëri.