Policia aksion në Vlorë, kontrolle për kamerat e instaluara nga grupet kriminale

Kanë nisur edhe në Vlorë kontrollet për zbulimin e kamerave të sigurisë të instaluara në rrugët e qytetit, apo në biznese lokale, të cilat mund t’i shërbejnë organizatave kriminale. Aksioni ka filluar mëngjesin e sotëm, teksa policia e Vlorës shprehet e rezervuar në dhënien e informacioneve, madje edhe aksionin në fjalë po e zhvillon në mënyrë diskrete.

Priten informacione nëse edhe në Vlorë do të zbulohen ose jo kamera sigurie të kontrolluara nga krimi, të cilat mund të hiqen në ditët në vijim.

Kujtojmë që brenda dy viteve të fundit policia e Vlorës ka instaluar kamera sigurie në rrugët kryesore të qytetit, projekt i cili po vijon ende. Do të ketë një kontroll të imtësishëm edhe në serverat e këtyre kamerave sigurie për t’u siguruar se në mënyrë private edhe tek ato mund të ketë ndërhyrje nga organizatat kriminale. Gjithashtu po krehet zona në një territor të gjerë, për të evidentuar vendet ku mund të jenë vendosur kamera të tjera sigurie veç atyre të policisë së shtetit.

Policia e Vlorës konfirmon se deri tani ka patur kontrolle dhe sekuestro të kamerave të sigurise për gjithe ata persona të cilët i kanë vendosur ato në kundershtim me ligjin. Në shumë zona të qytetit janë vendosur kamera sigurie në hapësira publike që nuk i takojnë biznesit apo individëve. Këto kamera sigurie cënojne privatësinë e qytetarëve, teksa mund edhe të përdoren nga eksponent të krimit të organizuar.

LEXONI GJITHASHTU:

• Policia e Shkodrës çmonton 38 kamera të tjera sigurie: I shërbenin grupeve kriminale
• Kriminelët ‘kontrollojnë’ policinë, nis verifikimi i kamerave në çdo qytet
• Zëdhënësi i Policisë: Pas Shkodrës, po verifikojmë kamerat e instaluara në çdo qytet