Reali mposht Atleticon në derbi, zbulohen 4 skuadrat gjysmëfinaliste të kupës

Reali i Madridit dhe Atletik Bilbao janë dy skuadrat e tjera gjysmë finaliste të kupës së Spanjës, pas fitoreve të regjistruara mbrëmjen e së enjtes. Të besuarit e Karlo Ancelotit triumfuan në derbin ndaj Atletikos, ndërsa Bilbao mposhti Valencian në Mestaja.

Ndeshja e zhvilluar në Santiago Bernabeu dhuroi spektakël, ndërsa prodhoi 4 gola, me galaktikët të cilët shkojnë edhe më pranë trofeut të kupës. Atletiko e Simeones kaloi e para në avantazh duke shtangur vendasit me Moratën në minutën e 19-të. Në pjesën e dytë Rodrigo solli baraz peshën e përkohshme, ndërsa gjithçka u vendos nga koha shtesë. Benzema dhe Vinicius vulosën fitoren 3-1.

Në Mestaja Bilbao u tregua pragmatiste ku në 3 gjuajtje të bëra në portën kundërshtare shënoi 3 gola. Muniain, Williams dhe Vesga shënuan për miqtë, ndërsa goli për Valencian ishte një autogol i De Markos.

Sa i përket gjysmëfinaleve, pritet sërish hedhja e shortit për të zbuluar dy çiftet, ndërkohë 4 skuadrat në garë janë Barcelona, Reali i Madridit, Atletik Bilbao dhe Osasuna.

LEXONI GJITHASHTU: 

• Shkupi, kryeqyteti i RMV në mëshirën e industrive që ndotin ajrin
• Ngjela: Rama ekstradohet nëse vërtetë ka lidhje me ish-agjentin e FBI-së McGonigal