Më shumë denoncime për gjyqtarët, Metani: Drejtësisë i duhet mendimi akademik

Tirana është qarku me më shumë denoncime për gjyqtarët dhe prokurorët, ndërsa shifrat janë shqetësuese edhe për Vlorën.

Inspektori i Lartë i Drejtësisë, Artur Metani thotë se po kërkohet një balancë, nisur edhe nga mungesat si pasojë e vetingut.

“Sistemi i drejtësisë natyrisht po kalon një kohë të vështirë dhe një traumë të madhe përsa i përket numrit të vakancave. Po mundohemi t’i përgjigjemi në kohë ankesave të qytetarëve, por nga ana tjetër edhe mos të presionojmë sistemin gjyqësor për shkak të kësaj mungese. Është shumë e rëndësishme që kërkesa e qytetarëve për drejtësi të mos prekë cilësinë e dhënies së vendimeve nga gjyqtarët dhe prokurorët.”

Metani vlerësoi punën e përbashkët me Këshillin e Lartë Gjyqësor dhe Këshillin e Lartë të Prokurorisë.

“Kam gjetur bashkëpunim profesional nga të dyja institucionet, dhe këtë e shohim nga të gjitha procedimet që ILD ka paraqitur pranë të dy Këshillave. Për këtë arsye, e vlerësoj si të suksesshëm bashkëpunimin me të dyja Këshillat.”

I pranishëm në Vlorë, për të nënshkruar një marrëveshje bashkëpunimi mes ILD dhe Fakultetit të Drejtësisë në universitetin e këtij qyteti, Metani tha se sistemit të drejtësisë dhe institucionit që ai drejton, i duhet mendimi akademik, për të pasur një drejtësi më të mirë, ku të gjithë të kontribuojnë.

LEXONI GJITHASHTU

• Çështja McGonigal, Salianji i drejtohet SPAK: Duhet të ketë një hetim të plotë
• Ngjela: Rama ekstradohet nëse vërtetë ka lidhje me ish-agjentin e FBI-së McGonigal
• “Logjikë fshatari” Debat mes Ngjelës dhe moderatores: E mbyllim, me mua s’flet ashtu