Ish-agjenti i FBI dhe rusët, zbulohen lidhjet e McGonigal me biznesmenin e hoteleve

Miliarderi Oleg Deripaska nuk është i vetmi rus me të cilin ka bashkëpunuar ish-agjenti i FBI Charles McGonigal. Në pranverën e vitit 2022 ai rezulton të jetë punësuar nga një tjetër biznesmen rus, Vladislav Doronin, pronar i një rrjeti hotelesh me 5 yje në të gjithë botën.

McGonigal do të drejtonte departamentin e sigurisë për 34 hotelet e “Aman Resort”në pronësi të biznesmenit rus, bazuar në eksperiencën e tij të mëparshme në industrinë e pasurive të paluajtshme, pasi pas daljes në pension në 2018-tën u punësua si zëvendëspresident i lartë për sigurinë globale në gjigandin e pasurive të paluajtshme Brookfield Properties.

Këtë post ish-agjenti i FBI e la për t’ju bashkuar në 2022-shin kompanisë “Aman Resort”, shkruan gazeta amerikane “The Post”.

Me siguri sipas ekspertëve, lidhjet e McGonigal me Doronin do të ngrenë më shumë pikëpyetje për marrëdhëniet e tij me Rusinë.

“Me Doronin nuk është njësoj si me Deripaskën, i cili është nën sanksione nga SHBA. Por fakti që McGonigal rezultonte në listën e pagave të një biznesmeni rus shumë të fuqishëm, e bën atë më të lidhur me elitën ruse në mbarë botën”, ka deklaruar Louise Shelley, themeluese dhe drejtoreshë ekzekutive e Qendrës për Terrorizëm.

Vladislav Doronin ka lindur në Bashkimin Sovjetik, por ka hequr dorë nga shtetësia ruse në vitin 1986, dhe mban tanimë 2 shtetësi  të Zvicrës dhe Suedisë, dhe ka mbajtur qëndrime të forta kundër luftës në Ukrainë.

Ai ka deklaruar se i ka dhënë fund lidhjeve të tij të biznesit në Rusi në vitin 2014, por vitin e kaluar, RealDeal ka raportuar se dokumentet gjyqësore vërtetonin se Doronin kishte aksione në një kompani me bazë në Moskë deri në vitin 2022, kur ai ia transferoi pronësinë nënës së tij, e cila ende jeton në Rusi.

Por Vladislav Doronin tha se ato ishin “asete të trashëguara” që ishin drejt likuidimit dhe se ai nuk ka qenë i përfshirë në asnjë aktivitet zhvillimi që nga viti 2014.

LEXONI GJITHASHTU:

• “Rama korruptoi ish-agjentin”, Berisha merr fjalën në Kuvend, rrethohet nga garda
• Kam pasur vetëm raport miqësor, Rama: E kam takuar ish-agjentin e FBI-së