Albin Kurti: Asociacioni një etnik nuk është i mundur në Kosovë

Kryeministri i Kosovës, Albin Kurti, foli këtë të mërkurë gjatë një deklarate për mediat në lidhje me presionin ndërkombëtar për të pranuar asociacionin e komunave me shumicë serbe.

Kurti tha se një asociacion një etnik nuk është i mundur në një Kosovë shumëtnike, pasi sipas tij, kur u shpall pavarësia, Kosova nuk u cilësua si një vend shqiptar.

“Një asociacion një etnik nuk është i mundshëm në një Kosovë multietnike. Kur e kemi shpallur pavarësinë para 15 vjetësh thoshin se ndonëse Kosova me mbi 90 për qind shqiptarë s’bën të cilësohet shqiptar”, u shpreh kryeministri.

I pyetur nga gazetarët nëse i sheh zgjedhjet si referendum për asociacionin, Kurti u përgjigj se nuk mund të vendosë Serbia për politikën e brendshme në Kosovë.

“Zgjedhje në vitin 2022 ka pasur në Lëvizjen Vetëvendosje. Në vitin 2021 ka pasur zgjedhje parlamentare dhe zgjedhje lokale, s’mund të vendosë Serbia për Kosovën, së shpejti kremtojmë 15-vjetorin e shpalljes së pavarësisë dhe ne jemi krenarë me të arriturat në 2 vitet e fundit. Ju e patë dje kur Transparence International tregoi që dy vitet e fundit për 20 vende jemi më lart sa i përket luftimit të korrupsionit dhe imazhit të vendi”, tha Kurti.