Shkatërrim në Turqi e Siri, ekipet e shpëtimit në garë me kohën

Provinca e Hatajit, në Turqi, është shkatërruar nga tërmeti 7.8 ballë i shkallës Rihter, që tronditi vendin në orën 4 e 17 të mëngjesit, kur shumica e banorëve ishin në gjumë.

Aktualisht, skuadra të shumta shpëtimi po zhvillojnë kërkime nën rrënoja dhe kanë arritur të nxjerrin disa të mbijetuar, përfshirë këtu fëmijë.

Për momentin shifra e personave të shpëtuar nuk dihet ende, por ajo pritet të zbulohet në orët në vazhdim.

Operacionet e ekipeve të emergjencës po pengohen nga moti i ftohtë dhe operatorët janë në luftë me kohën.

Ndërkohë, pamje të ndërtesave të shkatërruara vijnë edhe nga qyteti Dijarbakir. Disa godina shumëkatëshe janë shkatërruar gjatë kërkimeve, duke detyruar njerëz të tjerë të braktisin shtëpitë e tyre.

Edhe përtej kufirit, në Sirinë fqinje, kërkimet për të mbijetuar vazhdojnë. Skuadrat e ndërhyrjes së shpejtë, të njohura si helmetat e bardha, kanë arritur të nxjerrin të gjallë disa persona në qytetet Hama dhe Afrin.

Tërmeti i fuqishëm, që u pasua nga një seri lëkundjesh sizmike, përveç se në Turqi dhe Siri u ndje edhe në Liban, Qipro dhe Izrael.

LEXONI GJITHASHTU:

• Nga Azia në Amerikën Latine, cilat janë vendet më të rrezikuara nga tërmetet
• “Vetëm hoteli ynë mbeti në këmbë” – Ekipi i mundjes i Kosovës i shpëton tërmetit