Plagoset më armë zjarri një person në Tiranë, lëndohet vëllai i tij

Dy vëllezër nga Laçi kanë mbetur të plagosur pas një ngjarjeje të ndodhur pranë një subjekti në rrugën “Faik Konica”.

Sipas informacionit paraprak, rreth orës 03:00, janë paraqitur për ndihmë mjekësore shtetasi Klisman Rrapushi (Lepuri) banues në Laç, i cili kishte marrë një plagë në këmbë që dyshohet se është shkaktuar nga armë zjarri, si dhe vëllai i tij, Klaudio Gega (Lepuri), i dëmtuar në këmbë si pasojë e një ndrydhjeje.

Burime zyrtare bëjnë me dije se të dy të dëmtuarit ndodhen jashtë rrezikut për jetën. Ata kanë deklaruar para hetuesve se janë sulmuar nga disa persona të paidentifikuar në ambientet e jashtme të një subjekti në rrugën “Faik Konica”.

Ndërkohë, grupi hetimor, nën drejtimin e Prokurorisë, ka nisur veprimet për zbardhjen e plotë të ngjarjes, identifikimin dhe kapjen e autorëve, si dhe dokumentimin e rrethanave që çuan në incident.