“Edhe sa idiotë kanë mbetur”, Olivér Várhelyi rebelohet ndaj eurodeputetëve

Zemërimi ka përfshirë Parlamentin Evropian pasi komisioneri për Zgjerimin i ka cilësuar ligjvënësit si “idiotë”, teksa kujtonte se mikrofoni i tij ishte i fikur.

Oliver Varhelyi po përballej me një seancë pyetje-përgjigje në sesionin plenar, që kishte në fokus forcimin e politikës së zgjerimit në Ballkanin Perëndimor.

Pas thuajse një orë e gjysmë debat, komisioneri hungarez u ul dhe u dëgjua teksa thoshte në hungarisht: “Edhe sa idiotë kanë mbetur?”.

Më vonë, ai shpërndau një deklaratë në Twitter, ku thoshte se sinqerisht pendohej për atë që e quante një “keqkuptim” gjatë sesionit plenar.

Por më herët, disa ligjvënës të Parlamentit Evropian kërkuan dorëheqjen e tij, ndërsa të tjerë u shprehën të tronditur.

“Ky perceptim negativ i një komisioneri ndaj përfaqësuesve të qytetarëve evropianë është një turp”, tha Pedro Marques, euro-deputet portugez, grupi Social-Demokrat.

Ligjvënësi që foli përpara komisionerit hungarez u përpoq të shpjegonte përse ai mund të ketë reaguar në atë formë.

“Fakti që unë pyeta se si mundet që një vend kandidat si Serbia të ketë lidhje të ngushta me Rusinë dhe nuk po vendos sanksione ndaj saj mund ta ketë provokuar atë”, u shpreh Tomislav Sokol, euro-deputet kroat, grupi i PPE-së.

Sidoqoftë, reagimi reflekton një rritje të tensionit në marrëdhëniet mes Várhelyi dhe ligjvënësve evropianë.

LEXONI GJITHASHTU:

• Oliver Varhelyi për reciprocitetin e targave: Veprimet e njëanshme nuk janë zgjidhje
• Oliver Varhelyi përkrahu ndarjen e Bosnjes, eurodeputetët kërkojnë hetim