Një aplikacion për Durrësin, ofron informacion për qytetin bregdetar në dy gjuhë

I gjithë Durrësi shumë shpejt pritet të gjendet në një aplikacion të vetëm.

“Visitdurres.al” është risia, që bashkia Durrës po përgatit për këtë sezon veror.

“Një nga nismat më inovatore është dizenjimi dhe krijimi i një aplikacioni. ‘Visitdurres.al’ do të ofrojë të gjithë gamën e informacionit për qytetin e Durrësit”, Floreta Kërtusha, përfaqësuese e Drejtorisë së Turizmit.

Krahas kësaj, drejtoria e turizmit po punon për krijimin e një portali unik me po të njejtin funksion.

Të aksesueshëm në dy gjuhë, Durrësi do të jetë kështu vetëm një “click” larg.

“Një veçanti për aplikacionin është fakti që informacioni do të jetë në dy gjuhë, atë angleze dhe shqipe. Kjo do t’u japë akses edhe turistëve të huaj, të cilët janë të interesuar për të vizituar Durrësin. Veç aplikacionit do të krijohet edhe një portal unik informacioni dedikuar turizmit”, u shpreh Kërtusha.

Ndërsa Durrësi vijon të mbajë “kurorën” e turizmit në vend, pse ky aplikacion kaq i domosdoshëm erdhi kaq vonë?

“Është iniciuar më herët, që në vitin 2019, por si pasojë e tërmetit dhe pandemisë u bë e pamundur ndërmarrja e nisme të tillë”, tha ajo.

Aplikacioni pritet të jetë gati para nisjes së sezonit turistik, kur dhe do të regjistrohen flukset e para të turistëve vendas dhe të huaj në qytetin bregdetar.

Ky i fundit, vitin e kaluar ishte kampion i turizmit dhe duket se këtë pozicion do ta mbajë edhe këtë vit.

LEXONI GJITHASHTU

• Aksident me vdekje në Durrës, ndërron jetë gruaja. Arrestohet shoferi
• Toka, apartamente e kazino, lista me 34 pasuritë e sekuestruara të Ervis Martinaj
• Një burrë me eksploziv afër parlamentit në Zvicër, evakuohet godina