1200 familje pa mjek, banorët e fshatit Dërsnik duhet të ecin 30 minuta në këmbë

Ambulanca është e re por brenda saj nuk ka mjek. Kjo është situata në fshatin Dërsnik të Bashkisë së Korçës ku më tepër se 1200 familje u duhet të vuajnë mungesën e mjekut e u duhet të shkojnë në ambulancat e fshatrave të tjerë për të marrë shërbimin e nevojshëm.

Ky i moshuar duhet të ecë 30 minuta në këmbë drejt fshatit Voskop për të marrë një rekomandim, pasi në Dërsnik mjeku mungon.

Banorët e këtij fshati tregojnë vështirësitë që sjell mungesa e një mjeku familje në këtë zonë

“Pa mjek, i japim mamisë me të shkruara të na i marrë në Voskop, kur të dalë për një muaj apo dy. Një zot e di, le të jesh i sëmurë, se ku vete, se ku s’vete asnjë se di. Këtu s’ka doktor fare”, thotë një banor.

“Nuk kemi mjek te ne jo. Ishte njeri po iku, mbetëm. Si ja bëjmë? Ne e dimë. Ikim në Voskop, marrim ato kartat pa të marrësh ilaçe. Si nuk lodhesh e mërzitesh, nuk është kollaj. Ne jemi pleq”, shprehet një tjetër.

Euroneës Albania pyeti Drejtorinë e Shëndetit Publik në Korçë mbi këtë problematikë, të cilët u shprehën se vendi është vakant për këtë pozicion pune, por ende nuk ka pasur asnjë aplikant të interesuar. Mungesa e mjekut i ka vënë në vështirësi, sidomos personat me sëmundje kronike, për të cilët kërkohen kontrolle të vazhdueshme mjekësore.