Dialogu Kosovë-Serbi, Zekirja Shabani: Serbia nuk ka për të hequr dorë nga asosacioni

Dialogu Kosovë-Serbi në aspektin teknik do të zhvillohet ditën e sotme dhe për këtë në një intervistë me Euronews Albania foli analisti politik, Zekirja Shabani i cili tha se pavarësisht provokimit të përfaqësuesve serb, asosacioni nuk do të jetë temë diskutimi në këto bisedime.

Mbajtja e maskave të zyrtarëve serb me logot e asosacionit ishte një tregues i qartë që serbët nuk do të heqin dorë nga asosacioni por sidoqoftë Kosova tashmë e ka të qartë se ky asosacion mund të formohet vetëm në bazë të vendimit të Gjykatës Kushtetuese.

“Serbia do të vazhdojë të insistojë që asosacioni të jetë temë e diskutimit në cilindo takim në Bruksel siç do të vazhdojë të mos e njohë pavarësinë e Kosovës,” – pohoi me bindje Shabani.

Fakti që Kosova nuk ka kapacitetin të diskutojë për asgjë tjetër përpos njohjes i jep më shumë prioritet Serbisë të mos heqë dorë nga diskutimet për asosacionin.