U përjashtua se i ra bilbilit, Spaho: Do thyej karriget nëse Rama pengon Komisionin

Në mbledhjen e Sekretariatit për Procedurat dhe Votimet në kuvend u diskutua përjashtimi i deputetëve të opozitës për bllokimin e foltores.

I pranishëm në seancë, deputeti Edmond Spahu kundërshtoi përjashtimin e tij sepse i ra bilbilit.

Deputeti i PD nënvizoi se veprimet e tij janë të nxitura nga kryeministri Rama, i cili nuk pranon të shkojë në Kuvend dhe të debatojë për çështjen McGonigal.

Spaho tha se sjella e tij mund të shkojë edhe deri në thyerjen e karrigeve në parlament, nëse Rama pengon të drejtën Kushtetuese të ngritjes së Komisioneve Hetimore.

“Kuvendi po më përjashton, ju po më përjashtoni. Ju më thoni që kam prishur rregullin e parlamentit, unë them jo sepse kam kërkuar gjëra në interes të vendit. Kam kërkuar seancë pyetjeje si dhe ngritjen e Komisionin Hetimor.

Çfarë ndodh? Kryeministri nuk vjen dhe ju nuk pranoni të ngrini Komisione Hetimore. Tani kryeministri del dhe thotë në media që nuk e lejon Komisionin Hetimor. Por çfarë thotë Gjykata Kushtetuese? Që Komisioni Hetimor është i detyrueshëm të ngrihet. Atëherë, unë të mos ngrihem për këtë të drejtë timen që kryeministri po ma merr me dhunë?!

Të pezullosh të drejtat Kushtetuese të deputetëve do të thotë grusht shteti, praktikisht. Sjellja ime është rrjedhojë e shkeljes së të drejtave të mia. Nuk do ta lejoj, do të kërkoj gjithandej, do të bëj zhurmë, do t’i bie bilbilit, do të thyej edhe karrige për të drejtën time”, tha Spaho.

LEXO GJITHASHTU:

• “4 orë që i bie bilbilit”, Braçe ironizon Spahon: Si nuk të zëvendësuan kolegët
• Balla: Kuvendi do bllokohet derisa Berisha të vijojë presionin ndaj drejtësisë