Basha në Twitter: Rama ka humbur kontrollin mbi pandeminë. Reagon kryeministri

“Numri i të sëmurëve nga Covid-19 po rritet përditë, fatalitetet po shtohen dhe kapacitetet shëndetësore po shkojnë drejt kolapsit. Rama ka humbur kontrollin mbi pandeminë, megjithëse vala e dytë ishte paralajmëruar. Po të na kishte dëgjuar, qeveria do kishte marrë masat e duhura,” – kështu u shpreh kryedemokrati Basha përmes një njoftimi në Twitter.

Duke theksuar se asgjë nuk është më e çmuar se jeta e njerëzve dhe duke bërë thirrje për rritje të numrit të testimeve, Lulzim Basha nënvizoi ndër të tjera se duhet vepruar për të rritur fondet e ndihmës për të sëmurët.

Kësaj deklarate i është përgjigjur dhe kryeministri.

Sipas tij aleatja e Bashës, Monika Kryemadhi me fushatën e saj nuk po bën gjë tjetër veçse po ndihmon në përhapjen e virusit ndërkohë që ka sjellë në vëmendje se kur nuk ndalon dot as aleaten e tij nuk mund të ndalojë dot një valë të dytë të COVID-19.

“Lulëzim Basha është kapur pas Covidit si i mbyturi pas fijes së barit dhe pretendon se ai do ta kishte ndaluar valën e dytë, ndërkohë që nuk ndalon dot as aleaten e tij në fushatën e saj për përhapjen e Covidit! Mirë u çmendën po pse të gjithë njëherësh, thoshte Shvjeku i shkretë,” – thuhet në deklaratën e Edi Ramës në Twitter.

Replikat mes liderëve politik nuk kanë ndaluar sepse Lulzim Basha përmes postimit të tij të radhës akuzoi kryeministrin për vdekjet e njerëzve që po ndodhin në vendin tonë.

“Gjendja po përkeqësohet. Për shkak të Ramës, njerëzit presin me ditë për tu testuar, nuk kanë lekë për ilaçet e dergjen të sëmurë në shtëpi. Shëndeti dhe pamundësitë ekonomike janë shqetësimi i çdo shqiptari sot. Por në vend që të japë para për testimet, ilaçet dhe të pamundurit, Rama e ka mendjen tek sulmet politike, ndërkohë që vazhdon të paguajë miliona për inceneratorët dhe tenderat korruptivë. Edhe sa njerëz duhet të vdesin për fajin e Ramës,” – u shpreh Basha.