OBSH: 8 gra në Shqipëri humbasin jetën për 100 mijë lindje të gjalla

Shqipëria ka vdekshmërinë amtare më të lartë se shumë vende të rajonit.

Referuar të dhënave zyrtare të publikuara nga Organizata Botërore e Shëndetësisë, përgjatë vitit 2020 në vendin tonë për çdo 100 mijë lindje të gjalla kanë humbur jetën 8 gra.

Vdekshmëria amtare ka ardhur në rritje nëse do të shikojmë të dhënat e viteve 2018 apo 2019 ku kishim 5 vdekje për 100 mijë lindje të gjalla.

Nëse do të krahasojmë me disa vende të rajonit shohim se vdekshmëria e nënave në Shqipëri është më e lartë se në Maqedoninë e Veriut, Itali, Malin e Zi, Bosnje Hercegovinë apo Bullgari.

Në nivel europian vdekshmëria amtare është 13 gra për 100 mijë lindje të gjalla.

Sa i takon botës, ekspertët referojnë se 800 gra humbasin jetën çdo 24 orë gjatë shtatzënisë dhe lindjes për shkaqe të parandalueshme.

 Midis viteve  2000 dhe 2020, raporti i vdekshmërisë amtare ka rënë  me rreth 34% në mbarë botën por për OBSH-në ato mbeten të larta dhe të papranueshme.

Ekspertët referojnë se gratë vdesin si pasojë e komplikacioneve gjatë dhe pas shtatzënisë dhe lindjes.

Komplikimet kryesore që përbëjnë gati 75% të të gjitha vdekjeve të nënave janë: hemoragjia, infeksionet, presioni i lartë i gjakut gjatë shtatzënisë, komplikacionet gjatë lindjes dhe aborti i pasigurt.

LEXONI GJITHASHTU:

• OBSH: Gripi i shpendëve, kërcënimi më i madh pas Covid-19
• COVID-19 | OBSH: 92% më pak infektime në një muaj, vdekjet bien 47%