Shqipëria drejt BE-së, Ilir Meta jep mesazhin për qytetarët: Ka dy alternativa

Pas sinjaleve jo pozitive dhe rezervave të shprehura për rrugën evropiane të Shqipërisë drejt Bashkimit Europian, ka reaguar edhe presidenti Ilir Meta.

Me një shënim të shkurtër në faqen e tij zyrtare në “Facebook”, z. Meta thotë se rruga e vërtetë e Shqipërisë ndahet më 25 prill, ditë kjo kur shqiptarët do t’u drejtohen kutive të votimit për të zgjedhur alternativën qeverisëse.

“25 prilli tashmë është një REFERENDUM me dy alternativa: Shqipëria në Europë ose në Gropë. Përgjigjja dihet që nga koha e Skënderbeut: Shqipëria në Europë!”, shkruan Meta.

Përmes një dokumenti, të cilin e ka siguruar Euronews Albania, qeveria holandeze e ka cilësuar si të parakohshëm qëndrimin e Komisionit Europian për Shqipërinë, i cili mes tjerash ka vlerësuar se vendi ynë ka bërë përparim vendimtar dhe se është afër përmbushjes së kushteve të vendosura nga Këshilli për Konferencën e Parë Ndërqeveritare.

Shteti holandez vlerëson arritjet e deritanishme të vendit, por shton se kushtet e vëna nga Këshilli në mars 2020 për Konferencën e parë Ndërqeveritare duhet të përmbushen bindshëm.

“Qeveria ndan analizën e Komisionit se Shqipëria ka treguar përparim në fusha të ndryshme, por përfundimi i Komisionit se pothuajse të gjitha kushtet janë përmbushur është i parakohshëm” thuhet në vlerësimin e qeverisë holandeze. 

LEXONI GJITHASHTU

• Ekskluzive: Euronews Albania siguron vlerësimin e vendeve anëtare të BE-së për Shqipërinë, 2 kushte të mbetura për konferencën e parë të anëtarësimit
• Ekskluzive/ Holanda e vendosur tek progresi i kërkuar, Shqipëria në ditë vendimtare për ta bindur
• Ku ndahet Holanda dhe Komisioni Europian për progresin e Shqipërisë drejt BE