Kurti: Isha i gatshëm të nënshkruaj marrëveshje, por pala serbe nuk e bëri

“Jemi në rrugë të mbarë të normalizimit të marrëdhënieve ndërmjet Kosovës dhe Serbisë për fqinjësi të mirë evropiane”.

Kështu deklaroi kryeministri i Kosovës, Albin Kurti pas takimit në Bruksel. Kurti ka thënë se ishte i gatshëm të nënshkruajë për dakordimin e sotëm rreth planit evropian, por sipas tij pala serbe ka refuzuar një gjë të tillë.

Kurti u shpreh se pala serbe ndonëse u pajtua, nuk pranoi të nënshkruante marrëveshje.

“Sot patëm një takim pozitiv konstruktiv në Bruksel dhe ky takim ishte konfirmim që propozimi evropian është i pranueshëm dhe i pandryshueshëm. Unë qysh më herët pata thënë që është bazë e mirë për diskutime të mëtejmë dhe është platformë solide për të ecur përpara dhe ecja përpara do të jetë për planin e zbatimit për çfarë do të ketë edhe diplomaci fluturuese siç quhet.

Por do të ketë edhe takim të radhës të nivelit të lartë diku nga mesi i muajit mars, me ndërmjetësimin apo fasilitimin e zotit Borrell dhe zotit Lajçak. Me këtë rast unë i falënderoj ata të dy për punën që kanë bërë deri më tash dhe besoj që jemi në një rrugë të mbarë dhe njëkahëshe të normalizimit të marrëdhënieve ndërmjet Kosovës dhe Serbisë për fqinjësi të mirë evropiane”, theksoi ai.