Edhe 1 vit pagë për 800 ish punonjës së rafinerisë së Ballshit

Naftëtarët e Ballshit do të paguhen nga buxheti i shtetit edhe për vitin 2023.

Me daljen nga puna pas mbylljes së raifnerisë në qytet për të dytin vit në radhë, kjo pagesë kalimtare do të jetë 34 mijë lekë deri në fund të marsit dhe për pjesën tjetër të vitit, 40 mijë lekë në muaj që përputhet me pagën minimale në vend.

Vendimi mbulon nevojat e 800 naftëtarëve, që janë në kushte papunësie për shkak të mbylljes së rafinerisë.

Nëse ndonjë prej tyre, ka nisur punë ose do të punësohet këtë vit, automatikisht përjashtohet nga ndihma e shtetit.

Naftëtarët qëndruan në grevë urie për më shumë se 40 ditë në vjeshtën e vitit 2021, pasi kompania private që menaxhonte rafinerinë kishte ikur pa u dhënë rrogat. Greva u mbyll pas marrëveshjes për pagesat kalimtare, që kapin një vlerë të përgjithshme rreth 300 mln lekë.