AKU vazhdon kontrollet, ndëshkohen 8 subjekte që tregtonin ushqim të pasigurt

Autoriteti Kombëtar i Ushqimit, vazhdon kontrollet dhe monitorimet nëpër subjekte të ndryshme, për të identifikuar shkeljet. Sipas të dhënave, 8 subjekte janë ndëshkuar nga AKU gjatë kontrolleve për përdorimin e vajit të palmës, konservantëve dhe niseshtesë.

Trupat inspektuese të Autoritetit Kombëtar të Ushqimit kanë ushtruar 21 inspektime dhe monitorime gjatë muajit shkurt në rang vendi, në subjekte me aktivitet import, shpërndarje me shumicë të produkteve ushqimore konkretisht (vaj palme, niseshte, konservantë dhe aditivë ushqimorë), si dhe në subjekte me aktivitet “Prodhim, përpunim qumështi dhe nënprodukteve të tij.

Gjatë kontrolleve të ushtruara në 21 subjekte, në 8 prej këtyre subjekteve është konstatuar tregtim i ushqimit të pasigurt, në mungesë të sistemit të gjurmueshmërisë, mungesë etiketimi dhe mosrealizim detyrash të lëna.

Për shkeljet e konstatuara trupat inspektuese të AKU-së vendosën 11 masa administrative me gjobë në vlerën e 1.700.000 lekëve, si dhe janë vendosur dy masa bllokimi në sasinë e 330 kilogramë të produkteve ushqimore të pasigurta për konsum. Autoriteti Kombëtar i Ushqimit vijon kontrollet pandërprerë në terren në garantimin e sigurisë ushqimore.