Naftëtarët pranojnë ofertën, Dautaj: Ishim të detyruar. Rama: Pa humbur kohë do kalojmë në veprim

Naftëtarët kanë pranuar ofertën e propozuar një ditë më parë nga kryeministri Edi Rama për një mbështetje financiare nga ana e qeverisë.

“Ishim të detyruar të pranonim ofertën e kryeministrit Rama,” kështu u shpreh për Euronews Albania, kryetari i Sindikatës së naftëtarëve në Rafinerinë e Ballshit, Sokol Dautaj i cili tashmë e deklaron të mbyllur grevën e urisë.

Sipas Dautaj, kryeministri u ka premtuar një pagë mbështetëse deri në momentin që do të vijë një investitor tjetër për të rivënë në punë rafinerinë e Ballshit. Nga njëra anë, naftëtarët kanë dalë të pakënaqur nga greva, pasi kryeministri nuk ka pranuar fare të diskutohet për pagat e prapambetura.

Por ajo që u ka ndezur më shumë shpresat e naftëtarëve, është fakti se kryeministri u ka premtuar se do të dalë garant për investitorët që do të vijnë.

Nga ana e tij, Kryeministri Edi Rama përmes një postimi në Twitter është shprehur i kënaqur me vendimin e marrë nga naftëtarët dhe garantoi se shumë shpejt do nisë puna për ta bërë realitet premtimin,

“Jam i kënaqur që naftëtarët e pranuan propozimin e qeverisë. I falenderoj për mirëkuptimin dhe besimin. Tani e ka radhën qeveria të kalojë nga mbështetja parimore në mbështetjen financiare. Pa humbur kohë. Brenda 48 orësh do takohem përsëri me përfaqësinë për të kaluar në veprim!” shkroi Rama në Twitter.

Jam i kënaqur që naftëtarët e pranuan propozimin e qeverisë. I falenderoj për mirëkuptimin dhe besimin. Tani e ka radhën qeveria të kalojë nga mbështetja parimore në mbështetjen financiare. Pa humbur kohë. Brenda 48 orësh do takohem përsëri me përfaqësinë për të kaluar në veprim!

— Edi Rama (@ediramaal) November 10, 2020