Shtyhet gjyqi ndaj ish-kryeprokurorit, avokati kërkoi të njihet me provën e re të sjellë nga akuza

Shtyhet seanca paraprake ndaj ish-prokurorit të përgjithshëm Adriatik Llalla nëse çështja ndaj tij do të kalojë për gjykim.

Llalla akuzohet nga SPAK për “Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, të kryer tre herë, të parashikuar nga neni 257/a, paragrafi (2) i Kodit Penal.

Gazetari i Euronews Albania, Eni Ferhati raportoi se seanca ishte parashikuar të zhvillohej në orën 10:00 vetëm me praninë e avokatit Sokol Hazizaj, por u shty me kërkesën e këtij të fundit për t’u njohur me një provë të re që u soll nga prokuroria ditën e sotme.

“Para disa muajsh gjykata i kishte lënë porosi prokurorisë për të kryente veprime hetimore shtesë dhe prokuroria ka paraqitur një provë të re sa i përket akuzave ndaj Llallës, që nuk bëhet e ditur, ndaj avokati ka kërkuar kohë të njihet me hetimet shtesë të kryera nga prokurori Klodian Braho”, raportoi gazetari i Euronews Albania.

 Seanca e radhës ndaj ish-kryeprokurorit u la më 19 nëntor.