Hetim për pastrim parash, kolegji turk padit zyrtarët e policisë

Kolegji Turk kallëzon në prokurori 12 zyrtarë të Policisë së Shtetit për veprime arbitrare. Sipas përfaqësuesit ligjor, policia ka bastisur zyrat e këtij institucioni arsimor në kundërshtim me ligjin ndërkohë që mësohet se ka një hetim penal për pastrim parash dhe fshehje të ardhurash.

Në cilësinë e përfaqësuesit ligjor të kolegjit turk, avokati Isuf shehu depozitoi në Prokurorinë e Tiranës një kallëzim penal për 12 zyrtarë të policisë të cilët akuzohen për shpërdorim detyre dhe veprime arbitrare.

Ndaj kolegjit “ Turgut Ozal ” mësohet se ka nisur një hetim për disa vepra penale si pastrim parash, fshehje të ardhurash, nga sektori kundër krimit ekonomiko-financiar në policinë e shtetit.

“Kanë kryer kontrolle pa pasur një mandate, një vendim prokurorie pa pasur një vendim gjykate. Të tillë veprime i ka diktuar edhe Prokuroria e Përgjithshme gati 20 vjet më parë si veprime që duhet të jenë në çfarëdolloj rasti në përputhej me dispozitat e procedurës penale”, tha avokati.

Disa ditë më parë agjentë të policisë kanë zbarkuar në zyrat e kolegjit turk duke sekuestruar dokumente shkresore në funksion të hetimit penal.