Largohet nga LSI-ja Edmond Panariti: Do angazhohem në një detyrë të rëndësishme

Ish-ministri i Bujqësisë, Edmond Panariti është larguar nga Lëvizja Socialiste për Integrim. Lajmin e ka dhënë vetë Panariti nëpërmjet një postimi në Facebook, ku ka njoftuar se është larguar nga kjo parti për t’u angazhuar në një detyrë të rëndësishme.

“Të dashur miq, kolegë dhe bashkëpunëtorë! Që nga dita e sotme kam vendosur të ndërpres  angazhimin tim si pjesë e strukturave të Lëvizjes Socialiste për Integrim, për shkak të një ftese për t’u angazhuar në një detyrë të rëndësishme .

Me këtë rast më lejoni t’ju falënderoj përzemërsisht për këtë rrugëtim 16 vjeçar të përbashkët, plot sfida, sakrifica dhe arritje.

Duke ju shprehur mirënjohje dhe falënderim për miqësinë vlerësimin dhe mbështetjen, ju siguroj që do të mbetem miku juaj përherë.”, shkruan Panariti.

Nuk dihet ende se cila është detyra e re Edmond Panaritin, që e “detyroi” atë të largohej nga partia, ku u angazhua për vite me radhë. Ky largim i tij nga LSI-ja ka ardhur 6 muaj para zgjedhjeve. 

Në vitin 2012 Panariti u emërua Ministër i Jashtëm i Shqipërisë dhe njëkohësisht mbajti edhe postin e Presidentit të Komitetit të Ministrave të Këshillit të Evropës.

Ndërsa në vitin 2013 ai u vendos Ministër i Bujqësisë, Zhvillimit Rural dhe Administrimit të Ujrave të Shqipërisë.