Dy ndeshje për të kryesuar grupin, Reja kërkon 6 pikë ndaj Kazakistanit dhe Bjellorusisë

Trajneri i përfaqësueses shqiptare të futbollit Edoardo Reja kërkon nga skuadra të marrë 6 pikë në dy ndeshjet e radhës në Ligën e Kombeve përballë Kazakistanit dhe Bjellorusisë.

Italiani 75-vjeçar ka besim se pavarësisht disa mungesave skuadra është gati për këto dy përballje.

“Lojtarët që kam aktivizuar më kanë krijuar një lloj garancie. Kemi marrë rezultate të merituara, por ka pasur edhe raste kur nuk kemi marrë. Ne mbetemi favoritë. Lojtarët që kanë luajtur më përshtaten më shumë në ndeshje. Duam të fokusohemi te Kazakistani. Kemi luajtur me ta para një muaji dhe ua dimë pikët e dobëta,” – u shpreh Reja.

Por reja nuk di vetëm pikat e dobëta të kundërshtarit por edhe të skuadrës së tij që për momentin mbetet reparti sulmues. Në këtë edicion të Ligës së Kombeve skuadra ka realizuar vetëm 2 gola në ndeshjen e parë me Bjellorusinë.

“Në momentin që dalim para porte, duhet të jemi konkretë. Trajneri duhet të punojë për këtë, fakti që skuadra ka pasur shumë raste, do të thotë se është bërë një punë e mirë. Duhet të fitojmë për të arritur objektivin tonë, që është vendi i parë në grup. Uroj që rastet e humbura në ndeshjet e kaluara, të jenë ruajtur për këto ndeshje,” – shtoi më tej trajneri Reja.

Përfaqësuesja luan të dielën përballë Kazakistanit ndërsa tre ditë më vonë gjen përballë Bjellorusinë. Të dyja këto ndeshje do të luhen në stadiumin Air Albania.