15 milionë euro nga BERZH, paratë për trajnimin e studentëve të mjekësisë për pandeminë

Qeveria shqiptare do të marrë nga Banka Europiane për Rindërtimin dhe Zhvillim një kredi prej 15 milion eurosh për të menaxhuar krizën COVID-19.

Në parlament është depozituar një projektligj i cili autorizon ekzekutivin shqiptar të lidhë një kontratë me BERZH në formën e një kredi e butë e cila do të shlyet për 12 vjet.

Një ndër format se si do të shpenzohen këto para është duke trajnuar profesionistë të kualifikuar në fushën e shëndetit, të cilët aktualisht nuk punojnë në sistemin publik si dhe të studentëve të vitit të fundit të mjekësisë, me qëllim ofrimin e shërbimeve klinike për t’iu përgjigjur pandemisë.

Krahas kësaj, janë parashikuar që me këto para të blihen edhe tampon testues për personat që janë të dyshuar si të prekur me COVID-19. Ndërsa për transportin e të sëmurëve është parashikuar edhe blerja e disa ambulancave të reja.

Kjo është kredia e radhës që qeveria shqiptare po merr nga bankat ndërkombëtare që nga zbulimi i pacientit zero në Shqipëri.