Këshilli i Ministrave miraton ndihmën financiare për naftëtarët e Ballshit

Këshilli i Ministrave ka marrë sot vendimin për t’u dhënë një ndihmë financiare prej 40 mijë lekë në muaj punonjësve dhe ish-punonjësve të rafinerisë së naftës në Ballsh. Sipas vendimit të qeveri, vendimi do të ketë efekt për periudhën nëntor 2020 – tetor 2021.

“Dhënie ndihme financiare prej 40 000 (dyzet mijë) lekësh në muaj për punonjësit dhe ish-punonjësit e rafinerisë së naftës, Ballsh, sipas listës bashkëlidhur këtij vendimi, për periudhën nëntor 2020 – tetor 2021.

Punonjësve, sipas pikës 1, të këtij kreu, t’u paguhen kontributet e sigurimeve shoqërore dhe shëndetësore për periudhën nëntor 2020 – tetor 2021, duke iu transferuar fondi përkatës Institutit të Sigurimeve Shoqërore dhe Fondit të Sigurimit të Detyrueshëm të Kujdesit Shëndetësor. Ndihmën financiare e përfitojnë punonjësit si më sipër, pavarësisht nëse kanë përfituar apo jo ndihmë financiare më parë”, thuhet në vendimin e Këshillit të Ministrave.

Në vendim thuhet se, efekti financiar për pagesën e dy muajve të këtij viti (92 mln lekë) do të mbulohet nga  fondi i alokuar Drejtorisë së Përgjithshme të Tatimeve për dhënien e ndihmës financiare sipas paketave përkatëse për përballimin situatës së krijuar nga COVID-19.

Kurse efekti financiar, për vitin 2021, në masën në masën 461 mln lekë do të përballohet nga buxheti i vitit 2021, nga fondi rezervë i buxhetit të shtetit.