“S’do dërgoj tanke në Kosovë”, Vuçiç: Serbët nuk marrin pjesë në zgjedhje

Presidenti i Serbisë, Aleksandër Vuçiç konfirmon se serbët nuk do të marrin pjesë në zgjedhjet e ardhshme lokale në katër komunat në veri të Kosovës.

Në një intervistë për median në Beograd, Vuçiç deklaroi se pas 24 prillit komunat me shumicë serbe do të drejtohen nga shqiptarët.

“Kurti do të drejtojë Mitrovicën e Veriut nga 24 prilli, dhe vetëm mendoni për ato autoritete dhe demokracinë e legjitimitetin, me 2 për qind të shqiptarëve që jetojnë aty. Do të jetë keq për serbët, sikurse nën okupim, ashtu do të jetë, prandaj njerëzit janë të shqetësuar. Çfarë mund të bëjnë ata? Çfarë duhet të bëj unë? A të dërgoj tanke? Nuk mund ta mposhti NATO-n, dhe nuk dua që ne të vdesim. Dua që gjërat të zgjidhen në paqe, të shkojnë drejt normalizimit”, tha Vuçiç.

Vuçiç ka akuzuar ndërkombëtarët për heshtje, sipas tij, lidhur me të drejtat e serbëve në Kosovës. Presidenti i Serbisë ka akuzuar kryeministrin e Kosovës për ‘taktika autoritare’ dhe provokime ndaj pakicës serbe në veri të vendit.

Zgjedhjet e parakohshme lokale në veri të Kosovës mbahen pas dorëheqjes së drejtuesve lokalë serbë. Ata u larguan nga detyra si shenjë pakënaqësie ndaj vendimit të Qeverisë së Kosovës për riregjistrim të makinave me targa ilegale serbe me targa të Republikës së Kosovës. Partitë politike serbe deklarojnë se do të marrin pjesë në zgjedhjeve, vetëm nëse formohet asociacioni i komunave me shumicë serbe, tërhiqen të gjitha njësitë speciale të Policisë së Kosovës nga veriu i Kosovës.

LEXONI GJITHASHTU:

• Vuçiç: Kurti do ta drejtojë Mitrovicën e Veriut prej 24 prillit
• Kurti-Vuçiç sërish bashkë. Çfarë pritet të ndodhë më 22 prill