Pesë prioritetet e qeverisë: shërbime online, bregdet i lirë, infrastrukturë, energji dhe legalizime

Qeveria ka zbardhur shtatë prioritetet e saj për periudhën deri në qershor 2021, ku pesë nga këto përparësi janë ekonomike. Kryeministri Rama premtoi dhënien e shërbimeve vetëm online ndaj qytetarëve, për të shmangur radhët e gjata dhe sekserët.  

Në 1 janar 2020, 40 për qind e shërbimeve qeveritare do të kalojnë nëpërmjet internetit, në qershor 67 për qind, për të kaluar 100 për qind në dhjetor.

Qeveria premtoi gjithashtu ndryshime thelbësore në energji dhe infrastrukturë, regjim të ri për vijën bregdetare, përfundimin e legalizimeve për shtëpitë dhe tokën bujqësore, si dhe shengen rajonal për lëvizjen e tregtinë e lirë në rajon.

Në mes të përpjekjeve për rindërtimin, që është një proces i gjatë që mund të kërkojë më shumë se vitin 2020, këto prioritete-premtime i ngjajnë më shumë një buqete dëshirash në Krishtlindje, me mundësi realizimi të kufizuar, për shkak të kohës dhe fondeve të pakta.