Ditëlindja e Bes Kallakut, gjobitet lokali ku u organizua festa, pezullohen 6 efektivë

Festa e 35-vjetorit të aktorit të humorit, Besart Kallaku ku morën pjesë rreth 30 persona në shkelje të masave anti-COVID ka sjellë ndëshkimin e pronarit të lokalit ku u mbajt eventi me 1 milionë lekë si dhe pezullimin nga detyra të 6 efektivëve.

Vendimi për këta të fundit mban firmën e drejtorit të policisë së Tiranës për shkak të  moskryerjes të kontrollit të territorit, në një kohë që vendi është ende nën masa kufizuese për shkak të pandemisë së Covid19.

Ceremonia e ditëlindjes së aktorit Bes Kallaku u zhvillua në një lokal në fshatin Laknas, Bashkia Kamëz. Pamjet filmike dhe fotot e postuara në rrjetet sociale nga të pranishmit në event çuan uniformat blu në gjobitjen e lokalit që pranoi organizimin e eventit në shkelje  të plotë të rregullave anti-COVID.

Sakaq, policia njofton se bazë të pamjeve filmike të administruara janë identifikuar të gjithë personat që ishin pjesëmarrës në aktivitetin e zhvilluar dhe do ndëshkohen me masë administrative për shkelje të masave kufizuese anti-COVID.

Në 35-vjetorin e aktorit të humorit nuk munguan as emrat e njohur të showbizit shqiptar dhe të politikës, mes të cilëve presidenti Ilir Meta dhe kryetarja e LSI, Monika Kryemadhi.