Rama i shmanget pyetjes së Euronews Albania për mungesën e transparencës me fondet e rindërtimit

Kryeministri Edi Rama iu shmang pyetjeve direkte nga Euronews Albania për mungesë të transparencës për sa i përket fondeve të rindërtimit.

Në konferencën për shtyp, e cila supozohej të kishte si temë qendrore programin e rindërtimit, kryeministri nuk dha përgjigje për sa i përket të ashtuquajturës Akademi të Transprencës, e cila duhej të ishte ngritur për të monitoruar fondet e siguruara nga konferenca e donatorëve.

Gazetarja e Euronews Albania Eksiola Shehu e pyeti kryeministrin se çfarë është bërë me të në një kohë kur në web-faqen qeveritare të rindërtimit nuk shfaqet asnjë e dhënë për transparencë kur klikohet në rubrikën “Transparenca”.

Kryeministri Rama mohoi pretendimet duke theksuar se në web janë “çdo veprim i kryer për tërmetin, nga pikëpamja proceduriale apo financiare”. Ai u përgjigj se “në rast të ndonjë pyetjeje specifike mund t’i drejtohej zyrës së ministrit të shtetit për Rindërtim, përfshirë edhe për çështjen për akademinë e transparencës”.

Akademia e Transparencës u përmend fillimisht në muajin mars pak javë pas konferencës së donatorëve në Bruksel ku vende të shumta u zotuan të ndihmonin me mbi 1 miliardë euro fonde për rimëkëmbjen e Shqipërisë nga dëmet që shkaktoi tërmeti.

Kjo strukturë u tha se do të ngrihej në bashkëpunim dhe mbështetje nga Agjencia e Shteteve të Bashkuara për Zhvillim Ndërkombëtar (USAID) në mënyrë që të sigurohej administrim i përgjegjshëm i fondeve.

Lexoni gjithashtu:

Rama: Shkollat s’konsiderohen vatër infeksioni, do vijojnë të hapura