“I shqetësuar për Gjykatën Speciale”, Kurti në median britanike: Ndihmon Serbinë

Kryeministri i Kosovës, Albin Kurti, në një intervistë për të përjavshmen britanike “The Sunday Times“, ka shprehur shqetësimin se gjyqi ndaj ish-krerëve të Ushtrisë Çlirimtare të Kosovës mund ta ndihmojë Serbinë të “rishkruajë historinë”, duke e zhvendosur fokusin nga krimet dhe mizoritë serbe gjatë luftës së fundit.

“Unë e mbështes llogaridhënien për luftën. Megjithatë, më duket e padrejtë që në qendër të vëmendjes po vihet Kosova, ndërsa Serbia jo vetëm që ka refuzuar të marrë përgjegjësinë për krimet e saj, por edhe i mohon ato”, tha Kurti.

Gjykata sipas Kurtit do ta inkurajonte “lojën” rajonale të Rusisë për ta minuar Kosovën

Kurti beson se Kremlini pa në Kosovë dhe në Ballkan një “front të dytë” të mundshëm kundër NATO-s pas pushtimit të Ukrainës.

“Kosova është një histori suksesi e NATO-s. Rusët duan që ajo të dështojë”, ka thënë Kurti. Në dhjetor, kujtoi ai, një grup i madh anëtarësh të  një organizatë nacionaliste serbe e lidhur me grupin paramilitar rus Wagner, u grumbulluan në anën serbe të kufirit me Kosovën, duke kërcënuar se do të përballeshin me trupat e NATO-s.

“Njëqind milje nga vendi ku po bëjmë këtë intervistë në zyrën e kryeministrit është një bazë ruse”, shtoi Kurti, duke iu referuar të ashtuquajturës “qendër humanitare” e Moskës në qytetin serb të Nishit. “Është plot me spiunë dhe agjentë që angazhohen në luftë hibride”.

LEXONI GJITHASHTU:

• ‘Serbët po vriten në Kosovë’, Bërnabiç: Vetëm Kurti duhet ta zbatojë marrëveshjen
• Lëvizje e lirë Kosovë-Shqipëri, Kurti: U shërben 200 mijë shqiptarë në kufi